Զանգվածային ցույցեր՝ վառելիքի գների կտրուկ աճի պատճառով

Սիրիայում վառելիքի գների կտրուկ աճի պատճառով զանգվածային ցույցեր են սկսվել։ Այս մասին հայտնում են տեղական ԶԼՄ-ները:

Գործողությունները սկսվել են նախորդ օրվա առավոտյան, շարունակվել ամբողջ օրը ու գիշերը։ Ցույցերի են դուրս եկել Ռաքքայի, Հալեպի և Իդլիբի բնակիչները։

Երեկոյան ցուցարարները, դժգոհելով վառելիքի գներից (որոնք բարձրացել են 25–40 տոկոսով), փակել են Սիրիայի խոշոր Հալեպ և Համա քաղաքները կապող M5 մայրուղին և սկսել են այրել անվադողեր։

Իշխանությունները հրշեջ մեքենաներ, զրահապատ տրանսպորտային միջոցներ և ոստիկանական ուժեր են ուղարկել Մաարաթ ան-Նուման տանող գլխավոր ճանապարհ:

Տեղական ԶԼՄ-ների հաղորդումների համաձայն՝ նախորդ օրվանից ԱԻ-95 բենզինն արժե 195 սիրիական լիրա (1,6 դոլար)՝ 152-ի փոխարեն (1,2 դոլար), դիզելային վառելիքը՝ 175 լիրա (1,43 դոլար)՝ 125-ի փոխարեն (1 դոլար):

Սիրիայի էներգետիկայի նախարարության մամուլի խոսնակ Աբդուլհամիդ Սիլաթը SANA պետական գործակալությանն ասել է, որ նավթամթերքի գները բարձրացել են համաշխարհային շուկաներում տիրող իրավիճակի և երկիր ներմուծման զգալի մասնաբաժնի պատճառով: