Հովիկ Աբրահամյանի որդու կալանքը երկարացվեց

«Հրապարակ»-ի տեղեկություններով՝ նախկին վարչապետ Հովիկ Աբրահամյանի որդու՝ Արգամ Աբրահամյանի կալանքի ժամկետն այսօր՝ հոկտեմբերի 8-ին, դատարանը եւս 2 ամսով երկարաձգել է՝ բավարարելով նախաքննական մարմնի միջնորդությունը։ Տեղեկությունը փորձեցինք ճշտել Աբրահամյանի պաշտպանից, սակայն նա մեզ չպատասխանեց, Քննչական կոմիտեից միայն փոխանցեցին, որ դատարան կալանքը երկարաձգելու վերաբերյալ միջնորդություն է ներկայացվել՝ այլ տեղեկություն չհաղորդեցին։ Հիշեցնենք` Արգամ Աբրահամյանը, որը Բարգավաճ Հայաստանի առաջնորդ Գագիկ Ծառուկյանի փեսան է, ձերբակալվել է օգոստոսի 8-ին։ Քննչական կոմիտեն նրան մեղադրում է պատվերով սպանության դրդելու համար։ Կոմիտեն հայտնում է, որ խոսքը 2023 թվականի ապրիլի 30-ին Մյասնիկյան պողոտայում տեղի ունեցած սպանության մասին է։ Ըստ իրավապահների՝ Արգամ Աբրահամյանը սպանությունը անձամբ չի կատարել, այլ իր անվտանգության աշխատակցին է հանձնարարել՝ հրազենով սպանել Ս․Վ․-ին։ Աբրահամյանը մեղադրանքը չի ընդունում։