Ստամբուլում կայացած իրավաբանական համաժողովի ընթացքում Թուրքիայի նախագահ Ռեջեփ Թայիփ Էրդողանը կրկին թիրախավորել է Իսրայելի քաղաքականությունը Մերձավոր Արևելքում․ փոխանցում է ՏԱՍՍ լրատվական գործակալությունը։ Թուրքական պետության ղեկավարը Թել Ավիվին մեղադրել է ցեղասպանական գործողությունների և միջազգային իրավունքի նորմերը բացահայտորեն անտեսելու մեջ։
Էրդողանի խոսքով՝ Իսրայելը պարբերաբար խախտում է 2025 թ․ հոկտեմբերին հաստատված հրադադարի ռեժիմը, ինչի հետևանքով կան հազարավոր զոհեր ու վիրավորներ քաղաքացիական բնակչության շրջանում։ Նա շեշտել է, որ Իսրայելի ագրեսիվ գործողությունները լուրջ փորձություն են ողջ մարդկության համար։
Անկարայի ղեկավարը վերահաստատել է Թուրքիայի պատրաստակամությունը՝ շարունակելու տնտեսական ու իրավական ճնշումները Իսրայելի նկատմամբ՝ ընդգծելով, որ իրենք պատրաստ են դիմակայել ցանկացած դժվարության, սակայն երես չեն թեքի նրանցից, ովքեր տառապում են անարդարությունից։