Բիշքեկում Նիկոլ Փաշինյանի հետ հանդիպման ժամանակ Ռուսաստանի նախագահ Վլադիմիր Պուտինը հայտարարել է, որ Ռուսաստանը շարունակում է մնալ Հայաստանի գլխավոր տնտեսական գործընկերը։
Պուտինի խոսքով՝ 2026 թվականի սկզբից Հայաստանի և Ռուսաստանի միջև ապրանքաշրջանառությունը կազմել է 2,5 միլիարդ դոլար։ Նա նաև ընդգծել է, որ Հայաստանի անդամակցությունը ԵԱՏՄ-ին, իր գնահատմամբ, տվել է տնտեսական արդյունքներ․ այդ ընթացքում Հայաստանի ՀՆԱ-ն աճել է երեք անգամ, իսկ հայկական ապրանքների արտահանումը ԵԱՏՄ երկրներ՝ տասնապատիկ։
Ռուսաստանի նախագահը անդրադարձել է նաև Հայաստանի՝ Եվրամիությանն անդամակցելու ձգտմանը։ Նա նշել է, որ դա Հայաստանի օրինական իրավունքն է, սակայն միաժամանակ կարող է որոշակի բարդություններ առաջացնել ԵԱՏՄ-ում Հայաստանի մասնակցության առումով։
Պուտինի խոսքով՝ Մոսկվայի համար կարևոր է հասկանալ Երևանի հետագա ռազմավարությունը։ Նա ընդգծել է, որ որքան արագ Հայաստանը որոշի ԵՄ-ին անդամակցության հարցում իր դիրքորոշումը, այնքան ավելի հստակ կլինի, թե ինչպես պետք է հետագայում զարգանան հայ-ռուսական հարաբերությունները։
Միաժամանակ Պուտինը հայտարարել է, որ Ռուսաստանը կողմ է Հայաստանի հետ բարեկամական և փոխշահավետ հարաբերությունների պահպանմանն ու զարգացմանը։
Հանդիպման ընթացքում անդրադարձ է եղել նաև խաղաղ ատոմի, տրանսպորտի և թվային տնտեսության ոլորտներում իրականացվող հայ-ռուսական համատեղ ծրագրերին։