«Արցախցիների նոր կենսաչափական անձնագրերում որպես ծննդավայր «Ադրբեջան» նշելու պահանջը միջազգային ստանդարտներից չի բխում։ Դա ՀՀ իշխանությունների քաղաքական որոշման և նոր օրենքի հետևանք է»։ Այս մասին հայտարարել է «Արցախ միությունը»՝ արձագանքելով Միգրացիայի և քաղաքացիության ծառայության պարզաբանմանը։
«Ոչ ICAO-ն, ոչ էլ ISO-ն չեն պարտադրում արցախցիների անձնագրերում նշել «Ադրբեջան»։ Այդ պահանջը բխում է բացառապես ՀՀ իշխանությունների քաղաքական որոշումից ու ՀՀ նոր օրենքից, որը հնարավոր է և անհրաժեշտ է փոփոխել»,- ասված է միության հայտարարության մեջ։
Կազմակերպության փոխանցմամբ՝ նախկին օրենքը հնարավորություն էր տալիս որպես ծննդավայր նշել միայն բնակավայրի անունը՝ Ստեփանակերտ, Մարտունի, Ասկերան կամ Մարտակերտ՝ առանց պետության անվանման։
«Ադրբեջան» գրառումը վերացնելու և նախկին հնարավորությունը վերականգնելու պահանջով միությունը դիմել է ՀՀ կառավարությանը և Ազգային ժողովին։
Հարցին անդրադարձել է նաև Արցախի նախկին պետնախարար Արտակ Բեգլարյանը՝ հայտարարելով, որ թույլ չի տա իր նոր անձնագրում որպես ծննդավայր «Ադրբեջան» նշվի։
«Թե ինչպես թույլ չեմ տալու, դա արդեն իրավական տեխնիկայի հարց է»,- ասել է Բեգլարյանը։