Արմեն Գևորգյանի և Յուրի Խաչատուրովի նկատմամբ բացակայելու արգելք չկիրառվեց

ՀՀ նախկին փոխվարչապետ Արմեն Գևորգյանն ու ՀՀ ԶՈւ գլխավոր շտաբի նախկին պետ, ՀԱՊԿ նախկին գլխավոր քարտուղար, գեներալ-գնդապետ Յուրի Խաչատուրովը կշարունակեն ազատ ելք ունենալ երկրից:

Հակակոռուպցիոն դատարանի դատավոր Սարգիս Պետրոսյանը մերժեց հանրային մեղադրող Հայկ Հովհաննիսյանի միջնորդությունը` բացակայելու արգելք կիրառվելու:
Գործով դատախազը միջնորդության համար որևէ հիմք չներկայացրեց և միայն նշեց, որ հիմնավոր կասկած կա, թե կարող են փախուստի դիմել: Փաստաբաններն արձագանքեցին՝ նշելով, որ եթե դատախազը փաստեր չի բերում, պաշտպանական կողմն էլ չգիտի՝ ինչ հակափաստարկ բերի:

Նիստը հետաձգվեց, քանի որ հանրային մեղադրողը խնդրեց հաջորդ դատական նիստին ներկայացնել գործով ապացույցների ծավալը: