Բռնագրավում են Հայաստանում այն ձեռնարկությունները, որոնցում ՌԴ–ն միլիարդներ է ներդրել. Շոյգուն մեղադրել է Հայաստանի իշխանություններին Ռուսաստանի հետ կապերը խզելու փորձի համար։
ՌԴ Անվտանգության խորհրդի քարտուղարը գիտափորձագիտական խորհրդի նախագահության նիստում հիշեցրել է, որ 1990-ականներին Ռուսաստանը Հայաստանին փրկել է տնտեսական և էներգետիկ փլուզումից, իսկ ԵԱՏՄ-ին անդամակցելու 10 տարիների ընթացքում Հայաստանի տնտեսությունն աճել է գրեթե 3 անգամ։
Հայաստանում գործող ռուսական բիզնեսի նկատմամբ կիրառվում է անբարյացակամ մոտեցում և բացահայտ կրկնակի ստանդարտներ։ Այն, ինչ կատարվում է ձեռնարկությունների և ամբողջ ոլորտների հետ, որոնցում Ռուսաստանը միլիարդներ է ներդրել, այլ կերպ, քան որպես «թշնամական զավթում» դժվար է բնութագրել։
Միաժամանակ, Շոյգուի խոսքով, Երևանը առաջ է քաշում «բացահայտ անհեթեթ» փաստարկներ։
Մասնավորապես, խոսքը այն պնդման մասին է, թե եթե հայկական երկաթուղու կառավարումը շարունակի մնալ Ռուսաստանի ձեռքում, ՀՀ–ն իբր կկորցնի միջազգային երկաթուղային ցանցերին ինտեգրվելու հնարավորությունները։