Կրթության, գիտության, մշակույթի և սպորտի նախարարությունում կադրային փոփոխություններ են տեղի ունեցել։
Վարչապետ Նիկոլ Փաշինյանը սեպտեմբերի 2-ին որոշումներ է ստորագրել, որոնց համաձայն՝ ԿԳՄՍ նախարարի տեղակալի պաշտոնակատարներ Արաքսիա Սվաջյանն ու Արթուր Մարտիրոսյանն ազատվել են զբաղեցրած պաշտոններից։
Որոշումներում նշվում է, որ երկուսն էլ ազատվել են «Հանրային ծառայության մասին» օրենքի համապատասխան դրույթների հիման վրա։
Արթուր Մարտիրոսյանն իր հեռանալու մասին հայտնել էր դեռ սեպտեմբերի 1-ին։ Նա նշել էր, որ այդ օրը ԿԳՄՍ նախարարի տեղակալի պաշտոնում իր աշխատանքային վերջին օրն է։ Մարտիրոսյանը նախարարությունում աշխատել է շուրջ 6,5 տարի՝ նշելով, որ այդ ժամանակահատվածը ներառել է ինչպես համավարակի և պատերազմի տարիների մարտահրավերներ, այնպես էլ ոլորտային լայնածավալ բարեփոխումներ։
Նա շնորհակալություն էր հայտնել վարչապետ Նիկոլ Փաշինյանին՝ նախարարի տեղակալի կարգավիճակով Հայաստանի Հանրապետությանը ծառայելու հնարավորության համար, ինչպես նաև նախկին և գործող նախարարներին ու նախարարության աշխատակազմին։
Արաքսիա Սվաջյանի պաշտոնից ազատման մասին որոշումը ևս հրապարակվել է սեպտեմբերի 2-ին։ Երկու պաշտոնյաների ազատման որոշումները ստորագրվել են առանձին։