«Հրապարակի» զրուցակիցը պաշտպանության նախկին նախարար Սեյրան Օհանյանն է:
— Արդեն քանի օր է՝ հայ հանրությունը քննարկում է ադրբեջանցի զինծառայողի՝ Հայաստան մուտք գործելու եւ անպաշտպան կնոջ վրա կրակելու դեպքը: Ադրբեջանցու գործողությունների արդյունքում հայ կինը կարող է առողջական լուրջ խնդիրների առաջ կանգնել, մինչեւ անգամ կորցնել ոտքը: Փաշինյանի իշխանավարման տարիներին Հայաստան մուտք գործելը, հայ մարդկանց վրա կրակելը դարձել են սովորական դեպքեր: Ձեր կարծիքով` ո՞վ է այս իրավիճակի պատասխանատուն, եւ ո՞ւմ բացթողումների արդյունքում են մեր սահմանները դարձել այսքան խոցելի ու անպաշտպան:
— Պետք է ամբողջովին հասկանալ այս դեպքը, սա արդյո՞ք ադրբեջանցի զինծառայողի դիրքերի լքում է, թե՞ կոնկրետ պլանավորված գործողություն: Այդ օրերին, երբ ադրբեջանցի զինվորը Հայաստան է ներխուժել, Ադրբեջանում զորավարժություններ էին անցկացվում, որոնք մարտավարական եւ հրամանատարաշտաբային բնույթի էին: Այդ զորավարժությունների ֆոնին հավանական է, որ կարող էր լինել հատուկ նշանակության գործողություն: Այդ ամենը հասկանալու համար՝ թերացմա՞ն արդյունք է սա, թե՞ դիտավորություն, պետք է հետաքննություն անցկացնել, եւ պետք է հստակեցվի, թե որ տարածքով է անցել ադրբեջանցին, այդ տարածքն ո՞ւմ պատասխանատվության տակ էր: Եթե հակառակորդի տված տեղեկություններն ենք ուսումնասիրում, ապա այդ զինվորը Լաչինի զորամասից է Հայաստան մտել, իսկ դա նշանակում է, որ նա սահմանը հատել է Իշխանասարի հատվածից: Այնտեղ մարտական ծառայություն` հերթապահություն է իրականացնում ԶՈՒ-ն: Հետաքննություն պետք է անցկացվի ոչ միայն պաշտպանության նախարարության եւ սահմանապահների շրջանում, այլեւ ընդհանուր համահավաք պետք է իրականացվի: Ծառայողական խումբ պետք է լինի, որը կհասկանա գործողությունների ընթացքը: Մարտական հերթապահության խնդիրներ, ԱԱԾ սահմանապահ ծառայությունների կողմից իրականացված ծառայություն: Սրանք առաջնային հարցերն են, իսկ հետո պետք է պարզել, թե ադրբեջանցու` ՀՀ սահմանը հատելուց հետո ինչպիսի համակարգված գործողություններ են տեղի ունեցել: Ըստ մեր ունեցած տեղեկությունների` Ադրբեջանի ղեկավարությունը Հայաստանի ԱԱԾ-ին զգուշացրել է, որ դիրքերից խուսափած զինծառայող ունեն: Դրանից հետո պետք է համակարգված գործողություններ հաջորդեին: Ընդհանուր որոնում պետք է իրականացվեր, որտեղ ներգրավված կլինեին բոլոր ուժային կառույցները, ե՛ւ ԱԱԾ-ի, ե՛ւ ՆԳՆ-ի համապատասխան ծառայությունները պետք է հստակ աշխատանքներ կատարեին, սակայն ադրբեջանցին մտել է մեր տարածք, իսկ այսօր ես տեսնում եմ քննարկումներ, որ ադրբեջանցի զինծառայողին պետք է վերադարձնել Ադրբեջանին, հակառակ պարագայում, եթե մերոնք էլ անցնեն սահմանը, չեն վերադարձվի եւ այլն: Այն, ինչ տեղի է ունեցել, հանցագործություն է: Եթե առաջներում մեր զինվորները մոլորվում էին, հատում էին սահմանը, ոչ մեկին վնաս չէին պատճառում, չէին կրակում ադրբեջանցիների վրա, այսօր չենք կարող չարձանագրել, որ այդ ադրբեջանցի զինծառայողը կրակել է հայ կնոջ, հայ մոր վրա: Ի դեպ, սա վերջին տարիներին երկրորդ դեպքն է: Վերջերս էլ Քաջարանի հատվածում էր նման դեպք տեղի ունեցել: Տեղի ունեցածը հանցագործություն է, պետք է քրեական գործի շրջանակներում, հենց Հայաստանում դատել այդ երիտասարդին: Ընդունված երեւույթ է, որ հանցագործին պետք է պատասխանատվության ենթարկել այն երկրում, որտեղ նա կատարել է հանցանքը: Իմ երախտագիտությունն եմ հայտնում այն հայ կնոջը, որը կարողացել է պաշտպանել իր զավակներին: Հետագայում` դատապարտումից հետո, ճիշտ կլինի փոխանակում կատարել ադրբեջանցի զինծառայողին` հայ ռազմագերիների հետ:
— Այս ամենի ֆոնին երեկ ՔՊ-ականներն ԱԺ-ում սադրեցին ընդդիմադիր պատգամավորներին: Հերթական ծեծկռտուքը տեղի ունեցավ: Տարիներ առաջ էլ Ձեզ էին սադրել, շշեր շպրտվեցին դահլիճում եւ այլն: Այսօր էլ, փաստացի` այս խառը ժամանակներում, երբ թվում է, թե իշխանության գերնպատակը պետք է լիներ երկրի անվտանգությունը, նրանք բացառապես զբաղված են ընդդիմադիրներին լռեցնելու, սադրելու եւ հանրության ուշադրությունը շեղելու գործողություններով:
— Նորություն չէ, որ Ազգային ժողովում, հատկապես 9-րդ գումարման ԱԺ-ում, բարեկրթության նորմերն անդադար խախտվում են, չնայած նրան, որ ԱԺ ղեկավարությունը խոստացել էր լինել բարեկրթության սահմաններում՝ այդ ամենի վրա կառուցելով նորմալ հարաբերություններ, սակայն իշխանական ֆրակցիան ամեն վայրկյան հակասում է իր առաջարկած բարեկրթության կանոններին: Հասարակությանը փորձում են օրակարգային հիմնական խնդիրներից շեղել, այդ պատճառով էլ տարբեր սադրանքների են դիմում: Մանր-մունր կենցաղային, միջադեպային խնդիրներով փորձում են մեր հանրությանն օրակարգային ու կարեւոր հարցերից շեղել՝ մոլորեցնելով: Ես տեսա, որ անգամ ծեծկռտուք տեղի ունեցավ, ինչն անընդունելի է եւ դատապարտելի: