23
Նիկոլ Փաշինյանը խոստովանեց, որ եկեղեցուն վերաբերող «զեկույցում» խմբագրումներ է արել։ Նա այդ մասին ասաց «Ինֆոքոմի» հետ հարցազրույցում։
«Ես կարդացել եմ զեկույցը մի քանի անգամ, այդ թվում խմբագրումներ եմ արել»,- ասաց ՀՀ վարչապետը՝ պատասխանելով հարցին` հնարավո՞ր է, որ ինքը խմբագրումներ էլ արած լինի։
Փաշինյանը նշեց՝ շատ բարձրորակ զեկույց է ստացվել, թեպետ չկարողացավ, ըստ էության, պատասխանել հարցազրուցավարի հարցին, թե ինչ մեթոդաբանություն է ունեցել զեկույցը։
«Մենք առաջ ենք քաշել թեզեր, որ Հայաստանյայց առաքելական սուրբ եկեղեցում էս-էս պատճառներով ճգնաժամ է․․․ Եվ մենք հանրային դաշտից հավաքագրել ենք արժանահավատության մի նվազագույն շեմ ունեցող տվյալները և դարձրել ենք զեկույց»,- ասաց նա։
Հարցազրուցավարը հետաքրքրվեց, թե նույն տրամաբանությամբ ինչու հանրությունը չպետք է հավատա ՔՊ-ականների կամ նույն Փաշինյանի, նրա ընտանիքի մասին հրապարակումներին։
ՀՀ վարչապետը նշեց՝ տեղեկությունները պետք է հերքվեն, իրենք, օրինակ, դատի են տալիս, հայտարարեց, թե «զեկույցում» ներառված հոգևորականները չեն կարողանալու նույն բանն անել, որովհետև, ըստ նրա, «զեկույցի» տեղեկությունները ճշմարիտ են։
Հիշեցնենք` սեպտեմբերի 24-ին հրապարակվեց հակաեկեղեցական արշավի զեկույցն ու «բարենորոգման» քայլերի հերթականությունը։ Այն պատրաստել է վարչապետի աշխատակազմի Հանրային կապերի և տեղեկատվության կենտրոնը (ինչպես հաճախ անվանում են «ֆեյքերի ՊՈԱԿ»-ը. խմբ․)։
Ավելի քան 70 էջից կազմված «զեկույցում» մի շարք մեղադրանքներ կան ոչ միայն կուսակրոնության ուխտի խախտումների, բարեվարքության վերաբերյալ, այլև բավականին ծանր մեղադրանքներ, այդ թվում՝ մանկապղծության վերաբերյալ։ Տարբեր բարձրաստիճան հոգևորականներ մեղադրվում են տարբեր հոգևորականների հանդեպ կիրառվող կամայական հետապնդումների, անհիմն կարգալուծությունների համար։