Ձերբակալվել է Նոյեմբերյանի համայնքապետ Արսեն Աղաբաբյանը
Նոյեմբերյանի համայնքապետ, «Ապրելու երկիր» կուսակցության անդամ Արսեն Աղաբաբյանը ձերբակալվել է։ Տեղեկությունը հաստատել է ՀՀ Հակակոռուպցիոն կոմիտեն՝ նշելով, որ ձերբակալությունը կատարվել է Կոմիտեում քննվող քրեական գործի շրջանակում։
Միաժամանակ, իրավապահները այս պահին չեն հայտնում, թե կոնկրետ ինչ արարքի կասկածանքով է համայնքապետը ձերբակալվել՝ պատճառաբանելով նախաքննության շահը։ Այլ մանրամասներ ևս առայժմ չեն հրապարակվում։
Աղաբաբյանը Նոյեմբերյանի համայնքի ղեկավար է ընտրվել 2021 թվականի դեկտեմբերին կայացած ՏԻՄ ընտրություններից հետո։ Չնայած «Քաղաքացիական պայմանագիրն» այդ ընտրություններում ստացել էր առավել շատ ձայներ, «Ապրելու երկիր» և «Հանուն Հանրապետության» կուսակցությունները կոալիցիա էին կազմել, ինչի արդյունքում Աղաբաբյանն ընտրվել էր համայնքապետ։
Նախկինում Աղաբաբյանի գործունեության վերաբերյալ նաև Կոռուպցիայի կանխարգելման հանձնաժողովում վարույթ էր հարուցվել՝ շահերի բախման առերևույթ դեպքի առնչությամբ։ Այդ գործը վերաբերել էր համայնքային գույքի վարձակալության և համայնքի բյուջեից կատարված վճարման հանգամանքներին։ Սակայն այս պահին պաշտոնական աղբյուրները չեն նշել՝ արդյոք ներկայիս ձերբակալությունը կապված է այդ դեպքերի հետ։