ՌԴ փոխվարչապետ Ալեքսեյ Օվերչուկը հայտարարել է, որ ԵԱՏՄ անդամ երկրների ղեկավարների կողմից բարձրացվել է Հայաստանում հանրաքվե անցկացնելու հարցը։
Խոսքը, մասնավորապես, Հայաստանի՝ Եվրոպական միության հետ մերձեցման և միաժամանակ Եվրասիական տնտեսական միության անդամակցության պահպանման հարցի շուրջ հնարավոր հանրաքվեի մասին է։
Հարցը վերջին շրջանում ակտիվորեն քննարկվում է ԵԱՏՄ շրջանակում։ Մայիսին ԵԱՏՄ անդամ մյուս չորս երկրների ղեկավարները հանդես էին եկել Հայաստանում համապատասխան հանրաքվեի անցկացման օգտին։
Միևնույն ժամանակ, վարչապետ Նիկոլ Փաշինյանը հայտարարել է, որ այս փուլում հանրաքվեի անցկացման համար հիմքեր չկան։ Սեպտեմբերի 1-ին Բիշքեկում Վլադիմիր Պուտինի հետ հանդիպման ժամանակ Փաշինյանը նշել է, որ Հայաստանը դեռ չի կատարել ԵԱՏՄ-ից դուրս գալու վերաբերյալ որևէ պաշտոնական ծանուցում, իսկ հանրաքվեի հարցը, իր գնահատմամբ, դեռ չի հասունացել։
ՌԴ նախագահ Վլադիմիր Պուտինն իր հերթին նշել է, որ Հայաստանի՝ ԵՄ-ին անդամակցելու ուղղությամբ շարժվելու դեպքում անհրաժեշտ է հստակեցնել Երևանի դիրքորոշումը, և որպես այդ հարցի լուծման տարբերակ առաջարկել է հանրաքվե անցկացնել։