ԱԺ «Հայաստան» խմբակցության պատգամավոր Լևոն Քոչարյանը բացառել է, որ խմբակցությունը կողմ քվեարկի իշխանության ներկայացրած նոր Սահմանադրության նախագծին՝ ընդգծելով, որ այն, իրենց գնահատմամբ, բերվում է Ադրբեջանի պահանջով։
Նրա խոսքով՝ Սահմանադրության փոփոխության անհրաժեշտության հարցը կարելի է քննարկել, սակայն գործող նախաձեռնությունը, իրենց գնահատմամբ, պայմանավորված է Ադրբեջանի նախապայմանով։ Քոչարյանը նաև նշել է, որ գործող Սահմանադրության որոշ դրույթներ չեն գործում, այդ թվում՝ իշխանությունների տարանջատման սկզբունքը։
Անդրադառնալով Փաշինյանի՝ արտահերթ ընտրությունների հնարավորության մասին հայտարարություններին՝ Քոչարյանն ասել է, որ դրանց անցկացնելու համար Փաշինյանը պետք է հրաժարական տա, իսկ Ազգային ժողովը երկու անգամ չընտրի նոր վարչապետ։
«Ուզում է արտահերթ ընտրություն, ուրեմն պետք է հրաժարական տա»,- նշել է նա՝ հավելելով, որ այս պահին նման գործընթաց չկա, ուստի չի ցանկանում գնահատել ընդդիմության շանսերը։
Քոչարյանը նաև քննադատել է Փաշինյանի՝ պետականակենտրոն ընդդիմություն ունենալու ցանկությունը։
Անդրադառնալով այն հարցին, թե ինչու Սահմանադրության հարցը չթողնել ժողովրդի որոշմանը՝ Քոչարյանը նշել է, որ վերջին ընտրություններում Փաշինյանը չի ստացել 50 տոկոսից ավելի ձայն և սահմանադրական մեծամասնություն չի ապահովել։