Եվրոպայի խորհրդի գլխավոր քարտուղար Ալեն Բերսեն հայտարարել է, որ Եվրոպայի աշխարհաքաղաքական ծանրության կենտրոնը աստիճանաբար տեղափոխվում է դեպի արևելք՝ ընդգրկելով Հայաստանը, Վրաստանը, Ադրբեջանը և Թուրքիան։
Բերսեի խոսքով՝ այս չորս երկրները գտնվում են մի տարածքում, որտեղ հատվում են Ուկրաինայում ընթացող պատերազմի, Մերձավոր Արևելքի հակամարտությունների և Կենտրոնական Ասիայում տեղի ունեցող քաղաքական ու տնտեսական փոփոխությունների ազդեցությունները։
Նա նշել է, որ տարածաշրջանում ստեղծված իրավիճակը Եվրոպայի համար նոր հնարավորություններ և միաժամանակ լուրջ մարտահրավերներ է առաջացնում։
Անդրադառնալով Հայաստանի և Ադրբեջանի հարաբերություններին՝ Բերսեն ընդգծել է, որ ներկայում կա իրական հնարավորություն՝ ձեռք բերված պայմանավորվածությունները վերածելու կայուն խաղաղության։ Նրա խոսքով՝ Հայաստանի և Թուրքիայի միջև նույնպես քայլեր են իրականացվում հարաբերությունների կարգավորման ուղղությամբ։