Ռուսաստանի փոխարտգործնախարար Միխայիլ Գալուզինը հայտարարել է, որ ռուսական կողմի ներգրավվածությունը Հայաստանի երկաթուղային ոլորտում չի խոչընդոտում երկրի՝ տարածաշրջանային լոգիստիկ նախաձեռնություններին մասնակցությանը։
Գալուզինի խոսքով՝ հենց ռուս երկաթուղային աշխատողների փորձն է նպաստել նրան, որ Հայաստանը կարողանա պահպանել իր մրցակցային առավելությունները։
«Դա է, որ այսօր թույլ է տալիս քննարկումներ ծավալել տարածաշրջանում հաղորդակցությունների ապաշրջափակման վերաբերյալ»,- նշել է ռուս դիվանագետը «ՌԻԱ Նովոստի»-ին տված հարցազրույցում։
Նա անդրադարձել է նաև Երևանի այն պնդումներին, թե ռուսական կոնցեսիան կարող է խոչընդոտել Հայաստանին՝ դառնալու տարածաշրջանային լոգիստիկ նախաձեռնությունների լիարժեք մասնակից։
«Երևանի փաստարկներն այն մասին, թե ռուսական կոնցեսիան, իբր, խանգարում է Հայաստանին դառնալ լոգիստիկ նախաձեռնությունների մասնակից, բացարձակապես չեն համապատասխանում իրականությանը»,- ասել է Գալուզինը։