Ռուսաստանի արտգործնախարար Սերգեյ Լավրովը հայտարարել է, որ Ռուսաստանում կփակվեն Գյոթեի անվան գերմանական ինստիտուտի բոլոր երեք մասնաճյուղերը։ Այս մասին նա հայտարարել է Վլադիվոստոկում անցկացվող Արևելյան տնտեսական ֆորումի ժամանակ։
Լավրովի խոսքով՝ որոշումը կապված է Գերմանիայի կողմից Բեռլինում գործող ռուսական մշակութային կենտրոնը՝ «Ռուսական տունը», փակելու որոշման հետ։
«Իհարկե, դրանք կփակվեն այն բանից հետո, երբ մեր մշակութային կենտրոնն այնտեղից դուրս հանեցին։ Հակառակ դեպքում մենք չենք հարգի մեզ»,– ասել է Ռուսաստանի արտգործնախարարը։
Գերմանիայի իշխանությունները, ռուսական կողմի պնդմամբ, որոշել են փակել Բեռլինի «Ռուսական տունը», ինչպես նաև Բոննում Ռուսաստանի հյուպատոսությունը։ Բացի այդ, խստացվել է Ռուսաստանի քաղաքացիների նկատմամբ սահմանային վերահսկողությունը։
Բեռլինի այս քայլերը տեղի են ունեցել Լայպցիգի օդանավակայանում անօդաչու թռչող սարքերի հայտնաբերումից հետո։ Օգոստոսի 4-ին օդանավակայանում հայտնաբերվել է անօդաչու սարք՝ ուկրաինական ռազմական տրանսպորտային ինքնաթիռի մոտ, իսկ ավելի ուշ հայտնաբերվել է ևս մեկ սարք և մոտ 50 գրամ պայթուցիկ նյութ։
Սեպտեմբերի 1-ին Գերմանիայի իշխանությունները Ռուսաստանին պաշտոնապես մեղադրել են Լայպցիգի օդանավակայանի վրա հարձակումը կազմակերպելու համար։ Գերմանիայի ներքին գործերի նախարար Ալեքսանդր Դոբրինդտի խոսքով՝ այդ եզրակացությունը հիմնված է անօդաչու սարքի կոնֆիգուրացիայի և դրա որոշ բաղադրիչների ուսումնասիրության վրա, որոնք, ըստ գերմանական կողմի, նախկինում օգտագործվել են Ռուսաստանի կողմից իրականացված այլ հիբրիդային գործողություններում։
Մոսկվան հերքել է մեղադրանքները և հայտարարել, որ Գերմանիայի քայլերին կտա «համարժեք պատասխան»։ Լավրովի վերջին հայտարարությունը դիտարկվում է հենց այդ պատասխան քայլերի համատեքստում։