Ասատրյանին և Թախմազյանին կարգալույծ հռչակելու հարցը եկեղեցու ներքին գործն է․ վարույթները կարճվել են

Ստեփան Ասատրյանին (նախկինում Տ. Արամ քահանա Ասատրյան) և Արամայիս Թախմազյանին (նախկինում Տ. Թադե քահանա Թախմազյան) կարգալույծ հռչակելու՝ Ամենայն հայոց կաթողիկոսի տնօրինությունն անվավեր ճանաչելու հայցը քաղաքացիական դատավարության կարգով քննության ենթակա չէ։

Նման որոշում է կայացրել Արմավիրի մարզի առաջին ատյանի ընդհանուր իրավասության դատարանը (նախագահել են դատավորներ Սիմա Աբովյանը և Հովհաննես Մելքոնյանը)։

Դատարանը կարճել է գործերի վարույթները և վերացրել Ասատրյանի՝ Սուրբ Հովհաննավանքի և Թախմազյանին՝ Թալինի եկեղեցու հոգևոր հովվի պաշտոնավարումն ապահովելու համար ավելի վաղ կիրառված հայցի ապահովման միջոցները։

Ստեփան Ասատրյանը և Արամայիս Թախմազյանը Հայ առաքելական սուրբ եկեղեցու դեմ հայց էին ներկայացրել փետրվարին:

Պահանջում էին անվավեր ճանաչել Ամենայն հայոց կաթողիկոս Գարեգին Բ-ի որոշումները և վերականգնել իրենց հովվական պաշտոններում։