Թրամփը սպառնում է Իրանին նոր հարվածներով․ «Մենք ուժեղ կհարվածենք»
ԱՄՆ նախագահ Դոնալդ Թրամփը հայտարարել է, որ Վաշինգտոնը պատրաստվում է պատասխանել Իրանի գործողություններին՝ սպառնալով նոր հարվածներով։ Նրա հայտարարությունը հնչել է ԱՄՆ-ի և Իրանի միջև ռազմական լարվածության նոր սրման ֆոնին։
Վերջին օրերին կողմերի միջև տեղի է ունեցել ուղիղ ռազմական փոխհրաձգություն։ ԱՄՆ-ը հարվածներ է հասցրել Իրանի Լարակ կղզու ուղղությամբ՝ հայտարարելով, որ թիրախավորվել են այն արձակման համակարգերը, որոնք, ըստ ամերիկյան կողմի, պատրաստվում էին Հորմուզի նեղուցում ծովային ականներ տեղադրել։ Իրանը պատասխանել է՝ հրթիռներ արձակելով Հորդանանում տեղակայված ամերիկյան երկու ռազմաբազաների ուղղությամբ։
Թրամփը հայտարարել է․ «Մենք ուժեղ կհարվածենք նրանց։ Պատասխան կլինի»։ Միաժամանակ ամերիկյան կողմը պնդում է, որ ներկայիս գործողությունները դեռ չեն նշանակում լայնածավալ պատերազմի վերադարձ։
Սեպտեմբերի 1-ին ԱՄՆ-ը նոր հարվածների շարք է սկսել Իրանի Իսլամական հեղափոխության պահապանների կորպուսի (ԻՀՊԿ) օբյեկտների ուղղությամբ։ ԱՄՆ Կենտրոնական հրամանատարությունը հայտնել է, որ գործողությունները կապված են նաև Հորմուզի նեղուցում առևտրային նավագնացության և ամերիկացի զինծառայողների դեմ իրանական սպառնալիքների հետ։
Իրանը, իր հերթին, հայտարարել է, որ պատրաստ է պատասխանել ամերիկյան նոր հարվածներին, սակայն միաժամանակ կոչ է արել Վաշինգտոնին պահպանել նախկինում ձեռք բերված պայմանավորվածությունները։
Այս զարգացումները կրկին մեծացրել են մտավախությունները, որ ԱՄՆ-ի և Իրանի միջև վերջին ամիսներին ձևավորված ռազմական առճակատումը կարող է նորից լայնածավալ բնույթ ստանալ։