«Ժողովուրդ» օրաթերթը գրում է.
ՄՍԾ նորանշանակ պետ Արամ Միրիջանյանը 2025 թվականին հայտարարագրել է ավելի քան 100 մլն 826 հազար դրամ եկամուտ։ Եկամուտների զգալի մասը գոյացել է անշարժ գույքի և ավտոմեքենայի վաճառքից։
Մասնավորապես, նա երեք անշարժ գույք է վաճառել՝ ընդհանուր 39.8 մլն դրամով, իսկ 2022 թվականի արտադրության Mercedes-Benz ավտոմեքենան՝ 16.5 մլն դրամով։ Միաժամանակ դեկտեմբերին համատեղ սեփականությամբ բնակարան է ձեռք բերել՝ 31.4 մլն դրամ հայտարարագրված արժեքով։
Տարեվերջին նրա կանխիկ միջոցները կազմել են 8.4 մլն դրամ, բանկային հաշիվներին ունեցել է 1.6 մլն դրամ։ Միրիջանյանը նաև հայտարարագրել է 33.5 մլն դրամից ավելի վարկային պարտավորություն, իսկ վարկերի մարմանը 2025-ին ուղղել է 19 մլն դրամ։
Նշենք, որ Արամ Միրիջանյանը մինչև նոր պաշտոնում նշանակվելը՝ 2025 թվականի սեպտեմբերից, զբաղեցնում էր Միասնական սոցիալական ծառայության պետի տեղակալի պաշտոնը։ Մինչ պետական համակարգում աշխատելը շուրջ 15 տարի աշխատել է բժշկական ոլորտում՝ որպես վիրաբույժ և բուժհաստատությունների ղեկավար։