Փաշինյանը Մոսկվայի համար մարդ է փնտրում․ Արմեն Գրիգորյանը հրաժարվել է

կողմից admin2

Հայաստանի իշխանությունները շարունակում են քննարկել Ռուսաստանում ՀՀ նոր դեսպանի թեկնածության հարցը։ «Ժողովուրդ» օրաթերթի տեղեկություններով՝ Նիկոլ Փաշինյանը դեսպանի հնարավոր թեկնածուների թվում դիտարկել է նաև Անվտանգության խորհրդի նախկին քարտուղար Արմեն Գրիգորյանին, սակայն վերջինս հրաժարվել է Մոսկվա մեկնելու և դեսպանի պաշտոնը ստանձնելու առաջարկից։

Ռուսաստանում ՀՀ դեսպանի պաշտոնը թափուր է դարձել այն բանից հետո, երբ Փաշինյանը հետ է կանչել Գուրգեն Արսենյանին։ Իշխանական շրջանակներում այդ որոշումը, ըստ հրապարակման, պայմանավորվել է Արսենյանի աշխատանքի՝ մասնավորապես հայ-ռուսական հարաբերությունների ուղղությամբ, սպասված արդյունքները չապահովելու հանգամանքով։

Միաժամանակ, «Ժողովուրդ»-ի իշխանական աղբյուրների փոխանցմամբ՝ Փաշինյանը ցանկանում է Մոսկվա ուղարկել ոչ թե պարզապես դիվանագետի, այլ քաղաքական թիմից այնպիսի ներկայացուցիչ, որը կարող է տարբեր մակարդակներում աշխատել ռուսական կողմի հետ և անհրաժեշտության դեպքում զբաղվել Երևան-Մոսկվա հարաբերություններում առաջացող խնդիրներով։

Այս համատեքստում Արմեն Գրիգորյանի անունը դիտարկվել է որպես հնարավոր տարբերակ։ Սակայն, ըստ նույն աղբյուրների, նա կտրականապես հրաժարվել է առաջարկից։ Այժմ նոր թեկնածուի որոնումները շարունակվում են, և վերջնական որոշում դեռ չկա։

Հարցը հատկապես ուշագրավ է Նիկոլ Փաշինյանի՝ Մոսկվա սպասվող այցի ֆոնին։ Վարչապետը հայտարարել է, որ Ռուսաստանի նախագահ Վլադիմիր Պուտինը իրեն հրավիրել է Մոսկվա, որտեղ, ի թիվս այլ հարցերի, քննարկվելու են տարածաշրջանային գործընթացները և Հայաստանի՝ Եվրամիության հետ հարաբերությունները։

Այսպիսով, Երևանը միաժամանակ փորձում է նոր դեսպան գտնել Մոսկվայում և ձևավորել այնպիսի դիվանագիտական ներկայացուցչություն, որը, իշխանության պատկերացմամբ, պետք է կարողանա աշխատել հայ-ռուսական հարաբերությունների ներկայիս բարդ օրակարգի պայմաններում։ Թե ով կզբաղեցնի այդ պաշտոնը, դեռ հայտնի չէ։

Ձեզ կարող է նաև դուր գալ

Focus Mode