Մոսկվայում Ռուսաստանի նախագահ Վլադիմիր Պուտինի նախագահությամբ տեղի է ունենալու ՀԱՊԿ Հավաքական անվտանգության խորհրդի նիստը։ Գագաթնաժողովի առանցքային քննարկումներից մեկը վերաբերելու է կազմակերպությունում Հայաստանի դիրքորոշմանն ու կարգավիճակին։
Ինչպես ավելի վաղ հաղորդել էր ՏԱՍՍ-ը, հղում անելով ՌԴ ԱԳ փոխնախարար Ալեքսանդր Պանկինին, Երևանն արդեն ավելի քան երկու տարի չի վճարում կազմակերպության անդամավճարները, ինչի հետևանքով նիստում կարող է քննարկվել Հայաստանին ՀԱՊԿ-ում ձայնի իրավունքից զրկելու հարցը։ Այս տեղեկությունը նոյեմբերի 10-ին հաստատել էր նաև Ռուսաստանի արտաքին գործերի նախարար Սերգեյ Լավրովը։
Միևնույն ժամանակ, Լավրովն ընդգծել է, որ ՀԱՊԿ-ի դուռը Հայաստանի առաջ փակված չէ, և որևէ մեկը մտադիր չէ նրան հեռացնել կազմակերպությունից, մանավանդ որ Երևանը դուրս գալու պաշտոնական հայտ չի ներկայացրել։
Բացի այս հարցից, նիստի ընթացքում նախատեսվում է ամփոփել Ռուսաստանի նախագահության շրջանակում կատարված աշխատանքները, հաստատել մինչև 2030 թվականը նախատեսված հակաահաբեկչական ռազմավարությունը, ինչպես նաև որոշումներ կայացնել ՀՕՊ համակարգի և հավաքական ավիացիոն ուժերի զարգացման ուղղությամբ։ Գագաթնաժողովի արդյունքներով նախատեսվում է նաև 2027 թվականին ՀԱՊԿ նախագահությունը փոխանցել Տաջիկստանին։