Եվրոպական մի շարք երկրներ ցանկանում են ավելի շատ գազ ստանալ Ադրբեջանից

կողմից badoyan

Ռուսական գազից կախվածությունը նվազեցնելու ճանապարհին եվրոպական մի շարք երկրներ հետաքրքրված են Ադրբեջանից էներգակիրների մատակարարումների ավելացմամբ։ 

Այս մասին եվրոպացի առաջնորդները խոսել են Դուբլինում կայացած Եվրոպական քաղաքական համայնքի գագաթնաժողովում, հայտնել է OC Media-ն։

Ադրբեջանի հետ էներգետիկ համագործակցությունն ընդլայնելու պատրաստակամության մասին հայտարարել են վեց երկրների ղեկավարներ։ Հատկանշական է, որ նրանցից չորսը՝ Լիտվան, Իռլանդիան, Մոլդովան և Չեխիան, ներկայումս ադրբեջանական գազ չեն գնում։

«Ազատության» փոխանցմամբ՝ գագաթնաժողովում անդրադարձ է եղել նաև Հայաստանի տարածքով Ադրբեջանը Նախիջևանին կապելու՝ «Թրամփի ուղի» (ԹՐԻՓՓ) նախագծին։ Լիտվայի նախագահ Գիտանաս Նաուսեդան, պատասխանելով դրա վերաբերյալ հարցին, կարևորել է տարածաշրջանային տրանսպորտային և էներգետիկ կապերի զարգացումը։

«Մենք աջակցում ենք կապակցվածության բոլոր նախագծերին։ Եվրոպայում այժմ քննարկում ենք տրանսպորտային և էներգետիկ կապերը, հատկապես՝ բալթյան երկրների միջև։ Սակայն կարծում եմ՝ հուսալի էներգամատակարարման համակարգ ստեղծելու համար շատ կարևոր է նաև Եվրոպայից որոշակիորեն հեռու գտնվող մեր բարեկամների մասնակցությունը», — ասել է Լիտվայի նախագահը։

Բուլղարիայի վարչապետ Ռումեն Ռադևն էլ ուղղակիորեն հայտարարել է, որ Սոֆիան ցանկանում է ավելացնել Ադրբեջանից գազի ներկրումը։

«Մենք որոշակի կարիքներ ունենք և երախտապարտ կլինենք, եթե Ադրբեջանը կարողանա ավելի շատ գազ մատակարարել Բուլղարիային», — ասել է նա՝ անդրադառնալով նաև Ադրբեջանի, Վրաստանի, Թուրքիայի և Բուլղարիայի միջև կանաչ էներգետիկ միջանցքի ստեղծման ծրագրին։

Չեխիայի վարչապետ Անդրեյ Բաբիշն իր հերթին ընդգծել է, որ Պրահան ցանկանում է հնարավորինս շատ մատակարարման աղբյուրներ ունենալ՝ տարբեր սցենարների պատրաստ լինելու համար։ Իսկ Մոլդովայի նախագահ Մայա Սանդուն հիշեցրել է, որ Քիշնևը վերջին տարիներին փորձում է նվազեցնել ռուսական էներգակիրներից կախվածությունը։

Եվրոպայի հետաքրքրությունը ադրբեջանական գազի նկատմամբ մեծացել է Ուկրաինա Ռուսաստանի ներխուժումից հետո։ Եվրահանձնաժողովի տվյալներով՝ եթե 2021 թվականին ԵՄ ներկրած գազի 45 տոկոսը Ռուսաստանից էր, ապա 2025-ին այդ ցուցանիշը նվազել է մինչև 12 տոկոս։

Ձեզ կարող է նաև դուր գալ

Focus Mode