Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է «Եկեղեցիները Մերձավոր Արևելքի խաղաղության համար» (Churches for Middle East Peace) կազմակերպության պատվիրակությանը՝ ուղեկցությամբ ԱՄՆ Հայոց Արևելյան թեմի միջեկեղեցական հարաբերությունների տնօրեն Գերաշնորհ Տ. Վիգեն արքեպիսկոպոս Այքազյանի։
Հանդիպմանը Վիգեն արքեպիսկոպոսը Նորին Սրբությանը ներկայացրել է պատվիրակության անդամներին՝ անդրադառնալով Մերձավոր Արևելքում խաղաղության հաստատման ու քրիստոնեական համայնքների զորակցության ուղղությամբ կազմակերպության կողմից տարվող աշխատանքներին։
Ամենայն Հայոց Կաթողիկոսը բարձր գնահատեց կազմակերպության գործունեությունը՝ մասնավորապես խաղաղության ամրապնդման, քրիստոնեական համայնքների իրավունքների պաշտպանության և Եկեղեցիների միջև համագործակցության զորացման ուղղությամբ գործադրվող ջանքերը։
Իր խոսքում Վեհափառ Հայրապետն անդրադարձ է կատարել աշխարհում և հատկապես Մերձավոր Արևելքում շարունակվող հակամարտություններին ու դրանց հետևանքով ստեղծված հումանիտար ճգնաժամին։ Այս համատեքստում Նորին Սրբությունը նաև բարձրաձայնել է բռնի տեղահանված արցախահայության իրավունքների պաշտպանության, Բաքվում պահվող հայ գերիների վերադարձի, ինչպես նաև Արցախի հայկական հոգևոր և մշակութային ժառանգության պահպանության խնդիրները։
Հայոց Հայրապետն անդրադարձել է նաև Հայաստանյայց Առաքելական Սուրբ Եկեղեցու և հայ ժողովրդի առջև ծառացած արդի մարտահրավերներին՝ շնորհակալություն հայտնելով կազմակերպությանը Եկեղեցուն և հայ ժողովրդին ցուցաբերվող աջակցության համար։
Զրույցի ընթացքում պատվիրակության անդամները վերահաստատել են իրենց զորակցությունը Հայոց Եկեղեցուն և պատրաստակամություն հայտնել շարունակելու ջանքեր գործադրել ամերիկյան եկեղեցական ու հասարակական շրջանակներում հայ ժողովրդի դիմագրաված դժվարությունների և Հայոց Եկեղեցու առաքելության վերաբերյալ իրազեկվածության բարձրացման ուղղությամբ։
Հանդիպմանն անդրադարձ է կատարվել նաև Մերձավոր Արևելքում հայկական ներկայության ու քրիստոնեական ժառանգության պահպանությանը, ինչպես նաև տարածաշրջանի հայ համայնքների առջև ծառացած մարտահրավերներին։ Այս առնչությամբ կարևորվել են Եկեղեցիների համատեղ ջանքերը՝ ի նպաստ խաղաղության, արդարության և ժողովուրդների արժանապատիվ ու անվտանգ կյանքի ապահովման։