Ռուսաստանը չի հրաժարվել ո՛չ դոլարից, ո՛չ եվրոյից, hայտարարել է ՌԴ նախագահ Վլադիմիր Պուտինը Չինաստանում ԱԽՏՀ-ի գործարար գագաթնաժողովում:
«Իրենք իրենց պատժել են նրանք, ովքեր Ռուսաստանին արգելել են օգտագործել այդ արժույթները», ասել է Պուտինը։
ՌԴ նախագահը նշել է, որ Ասիա-խաղաղօվկիանոսյան տարածաշրջանը դարձել է համաշխարհային տնտեսության կենտրոն, մոլորակի արդյունաբերական և տեխնոլոգիական հանգույց։
Պուտինի խոսքով` Ասիայի երկրները հսկայական թռիչք են կատարել՝ «համաշխարհային գործարանից» վերածվելով նորարարության լոկոմոտիվների։
«Նոր հնարավորություններին հարմարվելու փոխարեն նախկին հեգեմոնները ձգտում են զսպել այն երկրների զարգացումը, որոնք այսօր առաջընթաց են գրանցում։ Ռուսաստանը արժանապատվորեն հաղթահարել է պատժամիջոցների փորձությունը»,- ասել է ՌԴ նախագահը։
Նա ընդգծել է` Ռուսաստանը կայուն կերպով ընդգրկված է աշխարհի խոշորագույն տնտեսությունների շարքում. վերջին երեք տարում ՀՆԱ-ն աճել է ավելի քան 10%-ով, իսկ պետական պարտքն ամենացածր մակարդակներից մեկն է աշխարհում` մոտ 17%։
«Ռուսաստանը թվային փոխակերպման առաջնագծում է, նրա լեզվական մոդելները լավագույններից են աշխարհում, և պատրաստ է ԱԽՏՀ գործընկերների հետ կիսվել տեխնոլոգիաներով, աջակցել նրանց տեխնոլոգիական ինքնիշխանության ամրապնդմանը»,- ասել է Պուտինը։
ՌԴ նախագահը նշել է, որ Եվրամիությունն այդպես էլ չկարողացավ հարմարվել ռուսական շուկայից ու էժան էներգակիրներից հրաժարվելու իրողությանը՝ աստիճանաբար զիջելով իր դիրքերն ու հնարավորությունները։ ԵՄ երկրներում կենսամակարդակն ընկնում է եվրագոտու համար նվաստացուցիչ տեմպերով։