Միավորված ազգերի կազմակերպությունը որևէ դերակատարում չի ունեցել Ղարաբաղի վերաբերյալ ՄԱԿ-ի Անվտանգության խորհրդի բանաձևերի կատարման գործում, հայտարարել է Ադրբեջանի նախագահ Իլհամ Ալիևը:
«ՄԱԿ-ի Անվտանգության խորհրդի՝ 1993 թվականին ընդունված չորս բանաձևերը (հայ-ադրբեջանական հակամարտության վերաբերյալ – խմբ․) կատարվել են երեք տարի առաջ (2023 թվականի աշնանը Ադրբեջանը զենքի ուժով լիովին վերականգնել է իր տարածքային ամբողջականությունը, ինչից հետո Ղարաբաղը լքել է ավելի քան 100 հազար բնակիչ – խմբ․)… Ցավոք, ՄԱԿ-ը որևէ դեր չի խաղացել այդ բանաձևերի կատարման գործում։ Ադրբեջանն ինքն է լիովին վերականգնել իր ինքնիշխանությունն ու տարածքային ամբողջականությունը», — ասել է Ալիևը Բիշքեկում Շանհայի համագործակցության կազմակերպության (ՇՀԿ) գագաթնաժողովի շրջանակում ընթացող «ՇՀԿ+» ձևաչափով նիստում:
Ղրղզստանն այս տարի ընդունում է գագաթնաժողովը կազմակերպության նախագահողի կարգավիճակում: ՇՀԿ-ի և «ՇՀԿ+» ձևաչափի շրջանակում միջոցառումներին մասնակցում են 17 երկրների և վեց միջազգային կազմակերպությունների ներկայացուցիչներ, այդ թվում՝ Ռուսաստանի նախագահ Վլադիմիր Պուտինը, ՉԺՀ նախագահ Սի Ցզինպինը, Հնդկաստանի վարչապետ Նարենդրա Մոդին: Միջոցառումներն անցկացվում են Ղրղզստանի նախագահ Սադիր Ժապարովի նախագահությամբ:
2023 թվականի սեպտեմբերին Ադրբեջանը լիովին վերականգնել է իր տարածքային ամբողջականությունը՝ Ղարաբաղում անցկացնելով ռազմական գործողություն, որը տևել է մեկ օրից էլ պակաս։ Այն ժամանակ տարածաշրջանի դե ֆակտո իշխանությունները հայտարարեցին 2024 թվականի հունվարի 1-ից չճանաչված հանրապետության «լուծարման» մասին։ 2023 թվականի սեպտեմբերի 24-ից մինչև ամսվա վերջ Ղարաբաղից Հայաստան է տեղափոխվել ավելի քան 100 հազար մարդ։